CONSELLERÍA DE SANIDADE
Primeiro. Determinación dos territorios para os efectos da aplicación da obriga de comunicación prevista na Orde do 27 de xullo de 2020 pola que se establecen medidas de prevención para facer fronte á crise sanitaria ocasionada pola COVID-19 en relación coa chegada á Comunidade Autónoma de Galicia de persoas procedentes doutros territorios.
De acordo co punto cuarto da Orde do 27 de xullo de 2020 pola que se establecen medidas de prevención para facer fronte á crise sanitaria ocasionada pola COVID-19 en relación coa chegada á Comunidade Autónoma de Galicia de persoas procedentes doutros territorios, deberán comunicar os datos de contacto e da súa estadía na Comunidade Autónoma de Galicia previstos no anexo da dita orde, nun prazo máximo de 24 horas desde a súa chegada, as persoas que cheguen á Comunidade Autónoma de Galicia despois de ter estado, dentro do período dos catorce días naturais anteriores á dita chegada, nos seguintes territorios:
a) En calquera dos países do continente africano.
b) Nos seguintes países e territorios de América: Ecuador, Guatemala, Honduras, Nicaragua, O Salvador, Paraguai, Venezuela, Haití, Nicaragua, Xamaica, Aruba, Bermudas, Illas Virxes Británicas, Illas Virxes Estados Unidos, Illas Caimán, Curaçao, Groenlandia, Porto Rico, San Martiño e Bonaire San Eustaquio e Saba.
c) Nos seguintes países e territorios de Asia: Bangladesh, India, Irán, Iraq, Líbano, Palestina, Filipinas, Afganistán, Bután, Brunei, Camboxa, Indonesia, Laos, Mongolia, Mianmar, Nepal, Paquistán, Siria, Iemen e Israel.
d) Nos seguintes países e territorios de Europa: Kósovo, Dinamarca, Andorra, Chipre, Illas Feroe, Francia, Xibraltar, Grecia, Guernesei, Islandia, Irlanda, Illa de Man, Xersei, Luxemburgo, Mónaco, Montenegro, Portugal, San Mariño, Eslovenia e Suíza.
e) Nos seguintes países e territorios de Oceanía: Australia.
f) En todas as comunidades e cidades autónomas de España excepto: Andalucía, Balears, Canarias, Castilla-La Mancha, Comunidade Valenciana e Madrid.
Segundo. Actualización
A presente resolución será obxecto de actualización nun prazo máximo de 15 días naturais.
Terceiro. Eficacia
A presente resolución producirá efectos desde o día seguinte ao da súa publicación no Diario Oficial de Galicia.
Cuarto. Recursos
Contra a presente resolución, que non pon fin á vía administrativa, poderase recorrer en alzada ante a persoa titular da consellería competente en materia de sanidade no prazo dun mes, contado a partir do día seguinte ao da súa publicación no Diario Oficial de Galicia, de conformidade co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas.
