AXUDAS AOS TITULARES DE EXPLOTACIÓNS LEITEIRAS EN DIFICULTADES

CONSELLERÍA DO MEDIO RURAL

ORDE do 20 de xullo de 2016 pola que se establecen as bases reguladoras das axudas para os titulares de explotacións leiteiras que estean en dificultades financeiras derivadas da súa actividade.

 Obxecto

Axudas para os titulares de explotacións leiteiras que estean en dificultades financeiras derivadas da súa actividade.

Persoas beneficiarias

Poderán ser beneficiarias destas axudas as persoas titulares de explotacións agrarias de vacún de leite que estean, no momento da publicación desta convocatoria, nalgunha das situacións relacionadas a seguir:

1. Con relación a cotas vencidas e impagadas ou embargos de préstamos:

a) Que teñan cotas vencidas e impagadas dun préstamo concedido para a mellora da súa explotación.

b) Que teñan unha resolución ou providencia de embargo de bens propios ou alleos por débedas relacionadas co impagamento dun préstamo concedido para a mellora da súa explotación.

2. Con relación á modificación das condicións do crédito concedido:

a) Que refinanciasen a débeda concedida pola entidade bancaria.

b) Que ampliasen o prazo do pagamento do crédito.

c) Que ampliasen o período de carencia do capital.

3. Con relación ás débedas con provedores da súa explotación gandeira vencidas e non pagadas, nas cales concorra algunha das seguintes circunstancias:

a) Que pasase un prazo de máis de tres meses desde o seu vencemento.

b) Que as obrigas fosen reclamadas xudicialmente.

O beneficiario deberá cumprir cos seguintes compromisos:

a) Exercer a actividade agraria na explotación da que é titular durante polo menos cinco anos contados desde a data de pagamento da axuda.

b) No prazo de 1 mes desde o pagamento da axuda, o beneficiario terá que acreditar que o importe da axuda foi destinado aos conceptos subvencionados.

Prazo de presentación de solicitudes

O prazo de presentación de solicitudes será de 1 mes, que se contará desde o día seguinte ao da publicación desta orde no Diario Oficial de Galicia.

PROGRAMA DE INCENTIVOS ÁS EMPRESAS DE INSERCIÓN LABORAL (EIL)

CONSELLERÍA DE ECONOMÍA, EMPREGO E INDUSTRIA

ORDE do 1 de xullo de 2016 pola que se establecen as bases reguladoras do Programa de incentivos ás empresas de inserción laboral (EIL) e ás súas entidades promotoras, e se procede á súa convocatoria para o ano 2016.

Obxecto

Promover a inserción sociolaboral das persoas en situación ou en risco de exclusión social mediante o establecemento de medidas de fomento das empresas de inserción laboral que teñan centros de traballo na Comunidade Autónoma de Galicia, previamente cualificadas no rexistro administrativo de Galicia.

Entidades beneficiarias

1. As entidades promotoras de empresas de inserción laboral e as empresas de inserción laboral que cumpran as condicións e os requisitos establecidos nela para os distintos tipos de axudas.

2. As empresas que solicitasen, conforme o procedemento establecido para o efecto, a súa cualificación como empresa de inserción laboral.

Tipos de axudas

1. As empresas de inserción laboral poderán acceder aos seguintes tipos de axuda:

a) Á contratación de persoas en situación ou en risco de exclusión social.

b) Á contratación de xerentes ou persoas técnicas necesarias para garantir a viabilidade técnica, económica ou financeira da empresa de inserción laboral.

c) Á contratación de persoas técnicas expertas en accións de orientación e acompañamento á inserción.

d) Á realización de labores de mediación laboral para a contratación de persoas en inserción no mercado laboral ordinario.

e) Á formalización de préstamos con entidades financeiras.

f) Á creación e ampliación do cadro de persoal das empresas de inserción laboral.

g) Ao inicio e posta en marcha da actividade.

h) Ao fomento de procesos de creación de empresas de inserción laboral e asistencia técnica.

2. As entidades promotoras de empresas de inserción laboral poderán ser beneficiarias dos seguintes tipos de axuda:

a) Á contratación de persoas técnicas expertas en accións de orientación e acompañamento á inserción.

b) Ao fomento de procesos de creación de empresas de inserción laboral.

Prazo de presentación de solicitudes

O prazo de presentación de solicitudes de todos os tipos de axudas do programa regulado nesta orde finalizará o 30 de setembro de 2016.

CORRECCIÓN DE ERROS.- PROGRAMA DE INCENTIVOS ÁS EMPRESAS IEBT

CONSELLERÍA DE ECONOMÍA, EMPREGO E INDUSTRIA

CORRECCIÓN de erros. ORDE do 10 de xuño de 2016 pola que se establecen as bases reguladoras do Programa de incentivos ás empresas cualificadas como iniciativas de emprego de base tecnolóxica (IEBT), cofinanciado polo Fondo Social Europeo, e se procede á súa convocatoria para o ano 2016.

LEI 13/2016 CREACIÓN DO COLEXIO OFICIAL DE TERAPEUTAS OCUPACIONAIS DE GALICIA

PRESIDENCIA DA XUNTA DE GALICIA

LEI 13/2016, do 26 de xullo, de creación do Colexio Oficial de Terapeutas Ocupacionais de Galicia.

PROGRAMA DE AXUDAS PARA IMPLANTAR A RSE, A IGUALDADE LABORAL E A CONCILIACIÓN LABORAL E PERSOAL NAS PEMES GALEGAS

CONSELLERÍA DE ECONOMÍA, EMPREGO E INDUSTRIA

ORDE do 1 de xullo do 2016 pola que se establecen as bases reguladoras do Programa de axudas para implantar a responsabilidade social empresarial (RSE), a igualdade laboral e a conciliación laboral e persoal nas pemes galegas, cofinanciadas polo Fondo Social Europeo, e se procede á súa convocatoria para o ano 2016.

Obxecto

Establecer as bases reguladoras, para o ano 2016, para a concesión, en réxime de concorrencia competitiva, de axudas e incentivos a pemes e micropemes, incluídos autónomos, para implantar a RSE, para a procura da igualdade laboral e a corresponsabilidade e a conciliación da vida familiar, persoal e laboral, no ámbito da Comunidade Autónoma de Galicia.

Persoas beneficiarias

Pequenas e medianas empresas (pemes), nesta consideración inclúense microempresas e persoas traballadoras autónomas con traballadores e traballadoras por conta allea, con domicilio social e centro de traballo en Galicia, calquera que sexa a súa forma xurídica, e que estean validamente constituídas no momento de presentar a solicitude de axuda.

Así mesmo, poderán ser beneficiarias as empresas con axencia, sucursal, delegación ou calquera outra representación en Galicia sempre que teñan contratado un mínimo dun 10 % do seu persoal en Galicia e, cando menos, catro persoas.

Importe

Para a concesión destas axudas destínanse cinco centos noventa e nove mil douscentos cincuenta e nove euros (599.259 €), de acordo coa seguinte distribución:

Liña I. Implantación da RSE: setenta e cinco mil euros (75.000 €).

Liña II. Elaboración e implantación de plans de igualdade: cen mil euros (100.000 €).

Liña III. Conciliación da vida laboral, familiar e persoal.

Programa 1. Incentivos económicos para o fomento de teletraballo e da flexibilidade horaria: catro centros mil euros (400.000 €).

Programa 2. Subvencións para a adquisición de elementos tecnolóxicos que fomenten o teletraballo: vinte e catro mil douscentos cincuenta e nove euros (24.259 €).

Prazo de presentación de solicitudes

O prazo de presentación de solicitudes será dun mes contado a partir do día seguinte ao da data de publicación desta orde no Diario Oficial de Galicia.

AXUDAS A FOMENTAR O ASOCIACIONISMO E A PARTICIPACIÓN DAS MULLERES

VICEPRESIDENCIA E CONSELLERÍA DE PRESIDENCIA, ADMINISTRACIÓNS PÚBLICAS E XUSTIZA

RESOLUCIÓN do 14 de xullo de 2016, da Secretaría Xeral da Igualdade, pola que se establecen as bases reguladoras das axudas destinadas a fomentar o asociacionismo e a participación das mulleres, e se procede á súa convocatoria para o ano 2016.

Obxecto

As axudas concédense en réxime de concorrencia competitiva e teñen por obxecto fortalecer e consolidar o movemento asociativo e potenciar a participación social e a calidade de vida das mulleres galegas a través das seguintes liñas:

a) Liña 1: consolidación do movemento asociativo, destinada a compensar gastos correntes que orixinen o mantemento e funcionamento das asociacións de mulleres e as súas federacións.

b) Liña 2: promoción de actuacións e actividades singularizadas en materia de igualdade, relativas á sensibilización e concienciación social, información ou formación en materia de igualdade e de prevención da violencia de xénero, ou dirixidas a potenciar e facilitar a mellora da calidade de vida e a participación das mulleres en todos os ámbitos.

Son subvencionables os gastos e as actuacións realizadas entre o 1 de xaneiro e o 31 de outubro de 2016.

Persoas beneficiarias

Poderán ser beneficiarias das axudas destinadas a fomentar o asociacionismo e a participación das mulleres as asociacións de mulleres e as federacións constituídas ao abeiro da Lei orgánica 1/2002, do 22 de marzo, reguladora do dereito de asociación, que teñan domicilio social en Galicia e estean inscritas na área de igualdade do Rexistro Único de Entidades Prestadoras de Servizos Sociais (RUEPSS), sempre que cumpran os demais requisitos e condicións establecidos nas bases reguladoras.

Prazo de presentación de solicitudes

O prazo de presentación de solicitudes será dun mes contado a partir do día seguinte ao da publicación desta resolución no Diario Oficial de Galicia. Entenderase como último día do prazo o correspondente ao mesmo ordinal do día da publicación. Se o último día de prazo for inhábil, entenderase prorrogado ao primeiro día hábil seguinte, e se no mes do vencemento non houber día equivalente ao inicial do cómputo, entenderase que o prazo expira o último do mes.

MODIFICACIÓN ORDE BOLSAS FORMACIÓN INVESTIGACIÓN MARIÑA

CONSELLERÍA DO MAR

ORDE do 12 de xullo de 2016 pola que se modifica, no relativo ás anualidades, a Orde do 9 de maio de 2016 pola que se aproban as bases que rexerán a convocatoria de bolsas para formación de persoal en temas de investigación mariña e se procede á súa convocatoria.