CONVOCATORIA PARA A CONCESIÓN DE MENCIÓN DE EXCELENCIA A TITULACIÓNS UNIVERSITARIA OFICIAIS DE MÁSTER IMPARTIDAS POLAS UNIVERSIDADES DO SISTEMA UNIVERSITARIO DE GALICIA NO CURSO ACADÉMICO 2020/21

 CONSELLERÍA DE CULTURA, EDUCACIÓN E UNIVERSIDADE

ORDE do 2 de marzo de 2021 pola que se establecen as bases reguladoras e se procede á convocatoria para a concesión de mención de excelencia a titulacións universitarias oficiais de máster impartidas polas universidades do Sistema universitario de Galicia no curso académico 2020/21.

Obxecto

Esta orde ten por obxecto establecer as bases reguladoras e convocar, en réxime de concorrencia competitiva, a concesión de mención de excelencia na Comunidade Autónoma de Galicia a un máximo de tres titulacións universitarias oficiais de máster impartidas polas universidades do Sistema universitario de Galicia.

Entidades destinatarias

Poderán solicitar a mención de máster universitario excelente as universidades do SUG.

Requisitos para solicitar a mención

1. Os másters para os que se solicite a mención de máster universitario excelente deberán cumprir os seguintes requisitos:

– Ser títulos de máster universitario de carácter oficial e validez en todo o territorio nacional, que conten coa autorización de impartición da comunidade autónoma.

– Que veñan sendo impartidos por algunha das universidades do SUG de xeito ininterrompido, como mínimo, desde o curso 2017/18 e que continúe impartíndose na actualidade.

2. Cada universidade do SUG poderá presentar, como máximo, tres solicitudes correspondentes a outras tantas titulacións de máster universitario oficial, tanto se as imparten en exclusividade como se figuran como universidade coordinadora, no caso de titulacións conxuntas.