CONSELLERÍA DO MEDIO RURAL
A Orde do 30 de decembro de 2022 pola que se establecen as bases reguladoras das axudas para accións silvícolas de prevención dos danos causados aos bosques por incendios, desastres naturais e para o incremento da capacidade de adaptación e do valor ambiental dos ecosistemas forestais, cofinanciadas polo Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020, e se convocan para o ano 2023 (código de procedemento MR605A) (Diario Oficial de Galicia número 19, do 27 de xaneiro de 2023), queda redactada como segue:
Un. Modifícase o artigo 5.1.a).1º, terceiro parágrafo, que queda redactado do seguinte xeito:
«Tamén é elixible a trituración dos restos, picadura ou extracción para o seu aproveitamento como biomasa; porén, non se poderá solicitar a trituración dos restos, a picadura nin a extracción para o seu aproveitamento como biomasa no caso de que a desmesta se realice totalmente de forma sistemática e mecanizada, salvo que os restos que se obteñan despois do tratamento permitan o seu aproveitamento como biomasa».
Dous. Modifícase o artigo 5.1.a).2º, terceiro parágrafo, que queda redactado do seguinte xeito:
«Tamén é elixible a trituración de restos de poda, a picadura ou extracción para o seu aproveitamento como biomasa».
Tres. Modifícase o artigo 5.6, que queda redactado do seguinte xeito:
«6. Os restos que se obteñan serán triturados in situ, picados ou ben extraídos do predio obxecto de axuda para o seu aproveitamento como biomasa».
Catro. Modifícase o punto 4 do anexo VIII, que queda redactado do seguinte xeito:
«Os restos que se obteñan como consecuencia da realización dos coidados culturais do voo con diámetro en punta delgada superior a 6 cm serán triturados in situ, picados cunha lonxitude inferior a 50 centímetros e con distribución homoxénea ou ben extraídos do predio obxecto de axuda para o seu aproveitamento como biomasa, e deberase xustificar documentalmente o dito aproveitamento xunto coa notificación de remate dos traballos».
Cinco. Modifícase a táboa nº 2 do anexo IX, códigos M12, M14 e M24, que quedan redactados do seguinte xeito:
M12: «Trituración dos restos, picadura ou extracción para o aproveitamento como biomasa».
M14: «Desmestas en masas de coníferas con diámetro normal medio inferior a 15 cm, acadando unha densidade final entre 800 e 1.200 pés/ha, en masas onde xa se executou unha desmesta en rúa. Deberase rozar a rúa, rarear a entrerrúa e picar ou extraer os restos».
M24: «Trituración dos restos, picadura ou extracción para o aproveitamento como biomasa».
Seis. Modifícanse os puntos 1.2, 1.4 e 2.4 do anexo XII, que quedan redactados do seguinte xeito:
«1.2. Trituración dos restos, picadura ou extracción para o aproveitamento como biomasa».
«1.4. Desmestas en masas de coníferas con diámetro normal medio inferior a 15 cm, acadando unha densidade final entre 800 e 1.200 pés/ha, en masas onde xa se executou unha desmesta en rúa. Deberase rozar a rúa, desmestar a entrerrúa e picar ou extraer os restos».
«2.4. Trituración dos restos, picadura ou extracción para o aproveitamento como biomasa».
Artigo 2. Ampliación de prazo
Ampliar o prazo de presentación de solicitudes establecido no artigo 12.1 da Orde do 30 de decembro de 2022 nun mes, contado a partir do día seguinte ao da publicación desta orde no Diario Oficial de Galicia.
Esta ampliación permite que as persoas que xa formularon solicitude no prazo transcorrido ata a modificación desta orde poidan manter ou modificar a solicitude ou que aquelas persoas que non formulasen solicitude con anterioridade poidan formulala tendo en conta as novas condicións.
Disposición derradeira única. Entrada en vigor
Esta orde entrará en vigor o mesmo día da súa publicación no Diario Oficial de Galicia.
