PROGRAMA CIENCIA-EMPRESA 2026

 Axencia Galega de Innovación

RESOLUCIÓN do 4 de marzo de 2026 pola que se establecen as bases reguladoras para a concesión, en réxime de concorrencia competitiva, das axudas para a posta en marcha de proxectos individuais de investigación e desenvolvemento cuxa actividade se enmarca nas prioridades estratéxicas da RIS3 Galicia 2021-2027, cofinanciadas pola Unión Europea no marco do programa de Galicia Feder 2021-2027, e se procede á súa convocatoria para o ano 2026, Programa ciencia-empresa (código de procedemento IN852F).

Obxecto

Apoiar a realización de proxectos de investigación industrial e de desenvolvemento experimental por parte das entidades beneficiarias que lles permitan desenvolver solucións tecnolóxicas de alto impacto, mellorar a súa competitividade e potenciar a xeración de emprego altamente cualificado.

Beneficiarios

Terán a consideración de entidades beneficiarias as pequenas e medianas empresas (pemes) que realicen un proxecto de I+D individual, cuxas actividades se desenvolvan en Galicia. As entidades beneficiarias deberán contar cun centro de traballo permanente legalmente constituído en Galicia onde realicen as actividades descritas na memoria técnica do proxecto.

Prazo de presentación de solicitudes

O prazo de presentación de solicitudes será dun mes, contado a partir do día seguinte ao da publicación desta resolución no Diario Oficial de Galicia.

Procedemento de concesión, período subvencionable e xustificación das axudas

As axudas concédense en réxime de concorrencia competitiva.

O período subvencionable comprenderá desde a data de presentación da solicitude ata o 30 de setembro de 2028.

A data máxima de xustificación das accións subvencionadas será o 15 de outubro de 2028.